Croeso i Ganolfan Cae

Cymro

Saif Canolfan Cae Cymro ar safle uwchben pentref Clawddnewydd, ger Rhuthun. Mae’n safle gyda golygfeydd bendigedig o Fryniau Clwyd, mynyddoedd y Berwyn, gyda thiroedd amaethyddol Dyffryn Edeyrnion yn y pellter. Mae Canolfan Cae Cymro yn ganolfan sy’n eiddo i’r gymuned a agorwyd yn swyddogol yn Ionawr 1998, yn dilyn cyfnod o godi arian gan gymuned Clawddnewydd, Derwen a Chlocaenog, a chyfraniad hynod hael o dir ar gyfer codi’r Ganolfan gan Mr Arthur Williams, Allt y Celyn. Mae’r Ganolfan yn adeilad aml-bwrpas, gyda neuadd fawr (lle i tua 180 i 200 o bobl ar gyfer cyngerdd neu 120 i fwyta), ystafell haul gyda lle i gynnal digwyddiadau ‘llai’ ar gyfer tua 25 o bobl i fwyta, cegin, ardal bar, toiledau, ystafell bwyllgora i fyny’r grisiau, a chyfleusterau cawodydd ar gyfer timau pêl droed. Mae maes parcio helaeth yn amgylchynu’r Ganolfan; maes chwarae i blant wrth y fynedfa, a chae pêl droed eang uwchben y safle. Caiff y Ganolfan ei defnyddio’n wythnosol ar gyfer amryw o weithgareddau, gan gynnwys dawnsio llinell, chwarae chwist a bowlio, cyfarfodydd crefyddol ac yn achlysurol ar gyfer priodasau, partion penblwydd, ymarferion, dramau, cyngherddau, cyfarfodydd, ciniawau a ffeiriau Nadolig. Bu’r Ganolfan yn ddigon ffodus yn ddiweddar i sicrhau cyllid sylweddol gan Gronfa Wynt Clocaenog, a’n galluogodd i ymateb i heriau moderneiddio adeiladau’r 21ain ganrif, gan gynnwys paneli solar, ynysu’r nenfwd, ffenestri, byrddau a chadeiriau newydd. Mae, felly, yn adeilad modern, aml-bwrpas arbennig iawn.